कोपरगाव तालुक्यातील…या तिर्थक्षेत्रास ‘क’ दर्जा प्राप्त

न्यूजसेवा
कोपरगाव-(प्रतिनिधी)
कोपरगाव विधानसभा मतदार संघातील तालुक्याच्या पूर्व भागातील वारी व परिसराचे श्रद्धास्थान असलेल्या वारी येथील श्री क्षेत्र रामेश्वर देवस्थानाला ‘क’ वर्ग दर्जा मंजूर करण्यात आला असल्याची माहिती आ.आशुतोष काळे यांनी आमच्या प्रतिनिधीस दिली आहे.

संकल्पित छायाचित्र.

आ.काळे यांनी मागील तीन वर्षात श्री क्षेत्र मयुरेश्वर गणपती देवस्थान पोहेगाव,श्री.लक्ष्मीमाता मंदिर देवस्थान कोकमठाण,श्री जगदंबा माता मंदिर देवस्थान ब्राम्हणगाव या तीर्थक्षेत्रांना ‘क’ वर्ग दर्जा मिळविला आहे. आता वारी येथील,’श्री रामेश्वर देवस्थान’या चौथ्या तिर्थक्षेत्राचा समावेश झाला आहे.

कोपरगाव तालुक्यातील वारी व पंचक्रोशीतील असंख्य भाविकांचे श्रद्धास्थान असलेल्या श्री क्षेत्र रामेश्वर देवस्थानास ‘क’ वर्ग दर्जा मिळावा व या तीर्थक्षेत्राचा विकास व्हावा अशी भाविकांची मागणी होती.त्या मागणीची दखल घेवून आ.काळे यांनी श्री क्षेत्र रामेश्वर देवस्थानास ‘क’ वर्ग दर्जा मिळावा यासाठी शासनदरबारी प्रस्ताव दाखल करून त्याबाबत त्यांचा पाठपुरावा सुरु होता.त्या पाठपुराव्याला यश मिळाले आहे.शनिवार दि.२४ डिसेंबर रोजी जिल्हाधिकारी कार्यालयात महसूल मंत्री तथा जिल्ह्याचे पालकमंत्री ना.विखे यांच्या अध्यक्षतेखाली पार पडलेल्या जिल्हा नियोजन समितीच्या बैठकीत श्री क्षेत्र रामेश्वर देवस्थानास ‘क’ वर्ग दर्जा देण्यास मंजुरी देण्यात आली आहे.
यावेळी त्यांनी कोपरगाव मतदार संघाच्या विकासकामांना जिल्हा नियोजन मधून जास्तीत जास्त निधी मिळावा अशी मागणी केली त्या मागणीला पालकमंत्री यांचेकडे केली असून त्यांनी सकारात्मक प्रतिसाद दिला आहे.या बैठकीसाठी जिल्हाधिकारी डॉ.राजेंद्र भोसले,खा.सदाशिव लोखंडे,खा.सुजय विखे,आ.संग्राम जगताप,आ.किरण लहामटे,आ.लहू कानडे,आ.राम शिंदे, आ.मोनिका राजळे,जिल्हा नियोजन अधिकारी भदाणे आदी उपस्थित होते.

सदर ठिकाणी हरतालिका पूजनासाठी दरवर्षी महिलांची मोठी गर्दी होते.या श्री क्षेत्र रामेश्वर देवस्थानास ‘क’ वर्ग दर्जा मिळाल्यामुळे मागील अनेक वर्षापासून प्रलंबित असलेल्या विकासकामांना गती मिळणार असून भाविकांसाठी चांगल्या दर्जाच्या सोयी सुविधा निर्माण होणार आहे.त्यामुळे वारी ग्रामस्थ व वारीसह पंचक्रोशीतील भाविकांनी आ.काळे यांचे कामाबाबत समाधान व्यक्त केले आहे.