खेळजगत
राष्ट्रीय पातळीवरील स्पर्धा आयोजन…या स्कुलचा सन्मान
न्यूजसेवा
कोपरगाव-(प्रतिनिधी)
भारतीय जम्प रोप असोसिएशनच्या वतीने घेण्यात येत असलेल्या राष्ट्रीय पातळीवरील स्पर्धा आयोजनाचा मान कोपरगाव येथील समता इंटरनॅशनल स्कूलला मिळालेला आहे.त्यामुळे देशातील खेळाडू कोपरगावात येऊन समताला भेट देणार आहे. ही स्पर्धा अ.नगर जिल्ह्यात पहिल्यांदा होत असल्याची माहिती अ.नगर जिल्हा जम्प रोप असोसिएशनचे अध्यक्ष संदीप कोयटे यांनी आमच्या प्रतिनिधीस दिली आहे.
“महाराष्ट्रात समता पॅटर्नने शैक्षणिक दृष्ट्या उंच भरारी घेतली आहे.ग्रामीण विद्यार्थ्यांनी यात यशाची शिखरे गाठलेली आहे.शैक्षणिक क्षेत्रात घेत असलेल्या या उंच भरारी बरोबरच शारीरिक दृष्ट्या विविध क्रीडा प्रकाराच्या माध्यमातून ग्रामीण विद्यार्थ्यांना सक्षम बनवत आहोत”-संदीप कोयटे,अध्यक्ष,अ.नगर जिल्हा जम्प रोप असोसिएशन.
समता नागरी सहकारी पतसंस्थेच्या स्व.मोहनलाल आनंदराम झंवर सभागृहात अहमदनगर जिल्हा जम्प रोप असोसिएशनचे अध्यक्ष संदीप कोयटे यांच्या अध्यक्षतेखाली बैठक पार पडली आहे.या बैठकीला भारतीय जम्प रोप असोसिअशनचे समन्वयक अशोक दुधारे,महाराष्ट्र जम्प रोप असो.चे सरचिटणीस दिपक निकम,अ.नगर जिल्हा जम्प रोप असो.चे कार्याध्यक्ष दिलीप घोडके,अ.नगर जिल्हयातील सर्व पदाधिकारी,सदस्य उपस्थित होते.
स्पर्धेविषयी अधिक माहिती देताना भारतीय जम्प रोप असो.चे समन्वयक अशोक दुधारे म्हणाले की,”समता इंटरनॅशनल स्कूल मध्ये ३ ते ५ फेब्रुवारी २०२३ या कालावधीत १४ वर्षाखालील मुले,मुली राष्ट्रीय फेडरेशन कप साठी आणि १७ वर्षाखालील मुले,मुलींमध्ये राष्ट्रीय स्पर्धा होणार आहे.या स्पर्धेत २७ राज्यातील खेळाडू सहभागी होणार आहे.स्पर्धेत यश संपादन केलेले खेळाडू आंतरराष्ट्रीय पातळीवर देशाचे प्रतिनिधित्व करणार आहे.ही स्पर्धा घेण्यासाठी भारतीय जम्प रोप असो.चे सरचिटणीस शहजाद खान यांनी मान्यता दिली असून राज्य,जिल्हा,तालुका स्तरावरील जम्प रोप असो.च्या बैठका आयोजित करण्यात येत आहे.
स्पर्धा यशस्वीतेसाठी भारतीय जम्प रोप असो.चे सरचिटणीस शहजाद खान,समन्वयक अशोक दुधारे,महाराष्ट्र जम्प रोप असो.चे सरचिटणीस दिपक निकम,समता इंटरनॅशनल स्कूलचे अध्यक्ष ओमप्रकाश कोयटे,अ.नगर जिल्हा जम्प रोप असो.चे अध्यक्ष संदीप कोयटे,कार्याध्यक्ष दिलीप घोडके,सचिव शिवप्रसाद घोडके,जिल्हयातील सर्व पदाधिकारी, सदस्य प्रयत्नशील आहेत.
भारतीय जम्प रोप असोसिएशनचे समन्वयक अशोक दुधारे यांचा सत्कार करताना अ.नगर जिल्हा जम्प रोप असोसिएशनचे अध्यक्ष संदीप कोयटे.समवेत महाराष्ट्र राज्य जम्प रोप असोसिएशनचे सरचिटणीस दिपक निकम,कार्याध्यक्ष दिलीप घोडके आदी मान्यवर दिसत आहे.
