शैक्षणिक
असे मिळवा जात वैधता प्रमाणपत्र

न्यूजसेवा
कोपरगाव-(प्रतिनिधी)
राजर्षी शाहू महाराज जयंती पर्वानिमित्त जिल्हा जात पडताळणी समितीच्या वतीने २६ जूलै २०२३ पर्यंत विशेष मोहीम राबविण्यात येणार आहे. इयत्ता ११ वी १२ वी विज्ञान शाखेत शिक्षण घेणाऱ्या मागासवर्गीय विद्यार्थ्यांना जात वैधता प्रमाणपत्रे या मोहीमेत दिली जाणार आहेत.
मागासवर्गीय प्रवर्गातील कोणीही विद्यार्थी जात वैधता प्रमाणपत्रापासून वंचित राहू नये हा या मोहिमेचा मुख्य उद्देश आहे.जातवैधता प्रमाणपत्रासाठी महाविद्यालये मागासवर्गीय विद्यार्थ्यांचे परिपूर्ण अर्ज घेतील आणि अ.नगर जिल्हा जात पडताळणी समितीकडे पाठवतील.जात वैधता प्रमाणपत्रा विषयी विद्यार्थ्यांना सहज,सुलभ मार्गदर्शन करणारे एकदिवसीय शिबीरांचे ही आयोजन करण्यात येणार आहे असे अ.नगर जिल्हा जात प्रमाणपत्र पडताळणी समितीच्या वतीने कळविण्यात आले आहे.
प्रमाणपत्रासाठी आवश्यक प्राथमिक कागदपत्रे-
ऑनलाइन पद्धतीने भरलेल्या अर्जाची मूळ प्रत,अर्जदार विद्यार्थ्याचे जात प्रमाणपत्र,विद्यार्थ्याचा शाळा सोडल्याचा दाखला,वडिलांचा शाळा सोडल्याचा दाखला,आजोबा/पंजोबा/खापर पंजोबा यांचा जात सिध्द करणारा पुरावा,महाविद्यालयाचे शिफारस पत्र,शपथपत्र,बोनाफाईड दाखला,वरील कागदपत्रांच्या माध्यमातून मागासवर्गीय विद्यार्थ्यांची जात सिध्द होत नसल्यास समिती अधिकचे पुरावे मागू शकते.त्यामुळे जात सिध्द करण्याकामी आवश्यक सर्व कागदपत्रे अर्जदाराने आधीच काढून ठेवणे आवश्यक आहे.
ऑनलाइन अर्ज कोठे भरावा-
जात पडताळणी प्रमाणपत्र घेऊ इच्छिणाऱ्या विद्यार्थ्यांनी डॉ.बाबासाहेब आंबेडकर संशोधन व प्रशिक्षण संस्थेच्या (बार्टी) https://bartievalidity.maharashtra.gov.in/ या संकेतस्थळावर जाऊन ऑनलाइन अर्ज भरावा आणि या अर्जाची प्रिंट काढून घेणे आवश्यक आहे. अधिक माहितीसाठी बार्टीच्या संकेतस्थळाला भेट द्यावी.