सहकार
राज्य पतसंस्था फेडरेशनच्या अध्यक्षपदी…या नेत्याची निवड
न्यूजसेवा
कोपरगाव-(प्रतिनिधी)
महाराष्ट्र राज्य सहकारी पतसंस्था फेडरेशनच्या अध्यक्षपदी पुन्हा ओमप्रकाश कोयटे यांची निवड झाली आहे.पुण्यात मंगळवारी झालेल्या नवीन संचालकांच्या बैठकीत पदाधिकाऱ्यांची निवड करण्यात आली आहे त्यात एकमताने हा निर्णय घेण्यात आला आहे.त्यांच्या निवडीचे राज्यात सर्वत्र अभिनंदन होत आहे.
सन-१९८० साली मुंबईत स्थापन झालेल्या या फेडरेशनचा कोयटे यांनी अध्यक्ष झाल्यापासून राज्यभर विस्तार केला आहे.त्यांनी पतसंस्थांचे अनेक प्रश्न मार्गी लावले असून,नुकतीच अंशदान वसुलीच्या निर्णयाला स्थगिती मिळविल्याने राज्यभरातील पतसंस्थांचे २१७ कोटी रुपये वाचले आहेत.या निर्णयामुळे फेडरेशनच्या कामाबाबत पतसंस्था विशेष समाधानी आहेत.विद्यमान अध्यक्ष असलेले कोयटे यांनी फेडरेशनवर १९९० सालापासून संचालक,सहसचिव,महासचिव या पदांवर काम केले असून,गेली १४ वर्षे ते अध्यक्ष या पदावर कार्यरत आहेत.
राज्य पतसंस्था फेडरेशनची पंचवार्षिक निवडणूक नुकतीच बिनविरोध झाली होती.त्यात ओमप्रकाश कोयटे (अहमदनगर) यांची अध्यक्षपदी,अ‍ॅड.दीपक पटवर्धन (रत्नागिरी) यांची कार्याध्यक्षपदी,शशिकांत राजोबा (सांगली) यांची महासचिवपदी, वसंतराव शिंदे (मुंबई) व डॉ.शांतीलाल सिंगी (औरंगाबाद) यांची उपाध्यक्षपदी,दादाराव तुपकर (जालना) यांची खजिनदारपदी, सुरेश पाटील (रायगड),अ‍ॅड.अंजली पाटील (नाशिक),चंद्रकांत वंजारी (ठाणे) व नारायण वाजे (नाशिक) यांची उपकार्याध्यक्षपदी,भारती मुथा (पुणे),शरद जाधव (पालघर),जवाहर छाबडा (कोल्हापूर) व भास्कर बांगर (पुणे) यांची सहसचिवपदी,तर राजुदास जाधव (यवतमाळ) यांची समन्वयकपदी निवड करण्यात आली.उप निबंधक दिग्विजय आहेर यांच्या उपस्थितीत झालेल्या या बैठकीला नवनिर्वाचित पदाधिकाऱ्यांसह सहकार भारतीचे राष्ट्रीय महामंत्री उदय जोशी, फेडरेशनचे संचालक राधेश्याम चांडक (बुलडाणा),धनंजय तांबेकर (नांदेड),रवींद्र भोसले (सातारा),वासुदेव काळे (अहमदनगर), सुभाष आकरे (गोंदिया),नीलिमा बावणे (नागपूर),मुख्य कार्यकारी अधिकारी सुरेखा लवांडे,तसेच सहकार सुगंधचे संपादक भालचंद्र कुलकर्णी उपस्थित होते.
दरम्यान त्यांची समता पतसंस्थाही तंत्रस्नेही व ग्राहकप्रिय असून,संस्थेकडे ७४८ कोटींच्या ठेवी आहेत.या संस्थेने ५४९ कोटींची कर्जे वितरित केली असून,त्यात २२२ कोटींची निव्वळ सोनेतारण कर्जे आहेत.समता लिक्विडिटी बेस्ड प्रोटेक्शन स्कीमअंतर्गत संस्थेकडील ९९.६७ टक्के ठेवीदारांच्या प्रत्येकी २४ लाख रुपयांच्या ठेवींना संरक्षण देण्यात आले आहे.हाच पॅटर्न राज्यभरातील पतसंस्थांना लागू करण्याचा प्रयत्न असल्याचे काका कोयटे यांनी सांगितले.राज्यभर १६ हजार पतसंस्थांचे नेतृत्व करणाऱ्या या संस्थांचे सव्वा दोन कोटी सभासद असून,दोन लाखांवर पदाधिकारी आहेत. या १६ हजार संस्थांच्या तब्बल ५० हजार शाखा आहेत. त्यातील दोन लाख दैनंदिन ठेव प्रतिनिधींमार्फत राज्यभरातील एक कोटी कुटुंबांशी,म्हणजेच सुमारे तीन ते चार कोटी व्यक्तींशी या पतसंस्था चळवळीचा संपर्क येतो.फेडरेशनने शिर्डी येथे बुलडाणा अर्बन पतसंस्थेच्या सहकार्याने स्वत:चे अद्ययावत व सुसज्ज असे प्रशिक्षण केंद्रही उभारले आहे.या फेडरेशनच्या मुख्य कार्यकारी अधिकारी म्हणून सुरेखा लवांडे गेली १४ वर्षे समर्थपणे जबाबदारी सांभाळत आहेत.
