गुन्हे विषयक
‘त्या’ गंभीर गुंह्यातील आरोपीच्या अडचणी वाढणार,कोपरगावातील घटना
न्यूजसेवा
कोपरगाव-(प्रतिनिधी)
कोपरगाव तालुक्यातील सहकारी साखर कारखानदारीत अग्रणी असलेल्या कर्मवीर शंकरराव काळे सहकारी साखर कारखान्याचे नूतन संचालक व कुंभारी येथील रहिवासी शिवाजी माधवराव घुले (वय-६३) यांना त्याच गावातील आरोपीनी केलेल्या मारहाणीत त्यांना गंभीर दुखापत झाल्याचे निष्पन्न झाल्याने त्या गुन्ह्यात भा.द.वि.कलम ३२६ ची भर पडणार असल्याची विश्वसनिय माहिती हाती आली असल्याने हि हाणामारी आरोपींना चांगलीच महाग पडणार असल्याचे दिसू लागले आहे.त्यामुळे आरोपीमध्ये भीतीचे वातावरण पसरले आहे.
दरम्यान याघटनेबाबत मिळालेल्या माहितीनुसार काल सकाळी राष्ट्रवादी समर्थक कार्यकर्त्यांनी या घटनेचा गावात ग्रामसभा घेऊन निषेध केला असल्याचे वृत्त आहे.त्यामुळे कुंभारी गावातील वातावरण शांततापूर्ण पण तणावात आहे.कोपरगाव तालुका पोलीस ठाण्याचे अधिकारी या घटनेवर लक्ष ठेवून आहे.
सदरचे सविस्तर वृत्त असे की,”फिर्यादी शिवाजी घुले व आरोपी किशोर कदम अन्य सहकारी हे एकाच गावाचे रहिवासी असून तालुक्यातील ईशान्य व पश्चिम गडाचे प्रस्थापित नेत्यांचे दोन गटाचे कार्यकर्ते आहेत.त्या गावात आगामी शनिवार दि.१८ फेब्रुवारी रोजी महाशिवरात्री उत्सव जवळ आला असताना त्यासाठी येथील महंतांनी त्यासाठी ग्रामस्थ आणि भाविकांची नियोजन बैठक काल सायंकाळी ०७.३० च्या सुमारास मंदिर परिसरात असलेल्या जागेवर आयोजित केली होती.त्या बैठकीसाठी कुंभारी येथील कार्यकर्ते,भाविक भक्त आणि ग्रामस्थ बहुसंख्येने उपस्थित होते.
सदर बैठकीस कर्मवीर काळे सहकारी साखर कारखान्याचे नूतन संचालक झालेले जेष्ठ कार्यकर्ते व फिर्यादी शिवाजी घुले हे सदर ठिकाणी जात असताना व तेथील माकड मंदिराच्या पायऱ्या चढत असताना आरोपी किशोर कदम,दत्तु कदम व निलेश कदम आदींनी त्यांना अडवून,”तुझे मंदिरात काय काम आहे ? असे म्हणून त्यांचा हातावर गजाने,हॉकी स्टिकने नाकावर व हाताच्या कांबीवर मारहाण करून दुखापत करून लाथा बुक्क्यांनी मारहाण करून शिवीगाळ करून जीवे मारण्याची धमकी दिली होती.याशिवाय जातीचा उल्लेख करून तुम्ही काय करणार आहे ? “तुमचे तीन घरे आहेत आम्ही गावाचे मालक असल्याचा दावा केले होता” त्याबाबत फिर्यादी घुले यांनी या प्रकरणी कोपरगाव तालुका पोलीस ठाण्यात तिन्ही आरोपी विरुद्ध गुन्हा दाखल केला होता.घटनेचे गांभीर्य ओळखून घटनास्थळी तालुका पोलीस ठाण्याचे पोलीस निरीक्षक दौलतराव जाधव यांनी भेट दिली होती.व फिर्यादिस सरकारी रुग्णालयात उपचारार्थ दाखल केले होते.त्यानुसार सदर वैद्यकीय अहवाल प्राप्त झाला असल्याची माहिती आहे.
दरम्यान या गुन्ह्यात कोपरगाव तालुका पोलीस ठाण्यात गु.र.न.७६/२०२३ भा.द.वि.कलम ३२४,३२३ ३४१,५०४,५०६ ४२७,३४ प्रमाणे गुन्हा दाखल केला होता.मात्र आता त्यात फिर्यादी व साखर कारखाना संचालक शिवाजी घुले यांच्या पायाचे बोट फ्रॅक्चर झाले असल्याची विश्वसनिय माहिती हाती आली आहे त्यामुळे त्यात भर पडून भा.द.वि.कलम ३२६ लागू होणार आहे.त्यामुळे हा गुन्हा आरोपीना जड जाण्याची चिन्हे आहेत.पुढील तपास पोलीस निरीक्षक जाधव यांचे मार्गदर्शनाखाली पोलीस नाईक व्ही.एन.कोकाटे हे करित आहेत.
