क्रीडा विभाग
…या संस्थेला राज्य स्तरीय फुटबॉल स्पर्धा आयोजनाचा बहुमान
न्यूजसेवा
कोपरगाव-(प्रतिनिधी)
कोपरगाव तालुक्यातील ग्रामीण भागातील संवत्सर येथे असलेल्या समता इंटरनॅशनल स्कूलला देशातील सीबीएसई पुरस्कृत शाळांपैकी २०२३-२४ ची ‘क्लस्टर ९ फुटबॉल चॅम्पियनशिप’ राज्य पातळीवरील स्पर्धा आयोजनाचा बहुमान मिळाला असल्याची धर्मादाय सह आयुक्त एस.एम.बुक्के यांनी दिली आहे.
“कोणताही खेळ हा जिंकणे किंवा हरण्यासाठी नसून खेळातून प्रतिभावान खिलाडू वृत्ती दर्शविण्याचा खेळ असतो.शिक्षणाबरोबरच ग्रामीण भागातील खेळाडूंना या स्पर्धेच्या माध्यमातून संस्थेचे अध्यक्ष ओमप्रकाश कोयटे यांनी एक संधी प्राप्त करून दिली आहे”-एस.एम.बुक्के,धर्मदाय सहआयुक्त.
अ.नगर जिल्ह्यातील कोपरगाव येथील कोकमठाण या ग्रामीण भागातील समता इंटरनॅशनल स्कूलच्या क्रिडांगणावर २९ ते ३१ ऑक्टोबर दरम्यान आयोजित राज्य पातळीवरील फुटबॉल स्पर्धेचे उद्घाटन धर्मादाय सह आयुक्त एस.एम.बुक्के,माउंट एव्हरेस्ट शिखर सर करणाऱ्या महिला गिर्यारोहक सुविधा कडलग यांच्या हस्ते आणि समता इंटरनॅशनल स्कूलचे संस्थापक ओमप्रकाश कोयटे,सी.बी.एस.ई.पुणे विभागाचे निरीक्षक गिरीश टोकसे यांच्या प्रमुख उपस्थितीत करण्यात आले.त्या वेळी ते बोलत होते.
सदर प्रसंगी समता इंटरनॅशनल स्कूल व्यवस्थापन समितीचे सदस्य अरविंद पटेल,चांगदेव शिरोडे,गुलशन होडे,भरत अजमेरे,व्यवस्थापकीय संचालक स्वाती कोयटे,मुख्य कार्यवाहक संदीप कोयटे,महाराष्ट्र व गोवा राज्यातील संघ,संघाचे प्रशिक्षक,क्रीडा प्रेमी मोठ्या संख्येने उपस्थित होते.
त्यावेळी पुढे बोलताना ते म्हणाले की,”कोणताही खेळ हा जिंकणे किंवा हरण्यासाठी नसून खेळातून प्रतिभावान खिलाडू वृत्ती दर्शविण्याचा खेळ असतो.शिक्षणाबरोबरच ग्रामीण भागातील खेळाडूंना या स्पर्धेच्या माध्यमातून एक संधी प्राप्त करून दिली आहे.समता इंटरनॅशनल स्कूलचे संस्थापक कोयटे यांच्या सामाजिक कार्याचे कौतुक केले आहे.त्या प्रमाणेच शिक्षण क्षेत्रातही त्यांनी ग्रामीण भागात समता इंटरनॅशनल स्कूल स्थापन करून १ तप पूर्ण केले असून सुविधा संपन्न असे वातावरण समता इंटरनॅशनल स्कूलमध्ये बनविलेले आहे.
यावेळी महिला गिर्यारोहक सुविधा कडलग म्हणाल्या की,”माउंट एव्हरेस्ट शिखर सर करण्यासाठी कमी कालावधी लागला,पण ते सर करण्याच्या सरावासाठी खूप कालावधी लागला.तसेच स्पर्धेतील प्रत्येक खेळाडू आणि समता इंटरनॅशनल स्कूलच्या विद्यार्थ्यांनी अधिकाधिक सराव केला तरच यश प्राप्त होत असते.माउंट एव्हरेस्ट सर करण्यासाठी सराव करत असताना मला समता परिवाराचे ही मोलाचे सहकार्य लाभले.
ग्रामीण भागातील मुलांना गुणवत्तापूर्ण शिक्षण मिळाले पाहिजे या उद्देशाने स्थापन करण्यात आलेल्या समता इंटरनॅशनल स्कूलला एक तप पूर्ण झाले असून ग्रामीण भागातील विद्यार्थ्यांनी ज्ञानाबरोबरच विविध क्रिडा प्रकारातही राज्य,राष्ट्रीय,आंतरराष्ट्रीय पातळीवर समता इंटरनॅशनल स्कूलचा झेंडा फडकविलेला आहे.या स्पर्धेद्वारा ग्रामीण भागातील विद्यार्थ्यांना फुटबॉल सारख्या खेळातून कला दाखविण्याची संधी प्राप्त करून दिली असल्याचे स्कूलचे संस्थापक काका कोयटे यांनी सांगितले.
प्रमुख पाहुणे एस.एम.बुक्के यांचा सत्कार कोयटे,गिर्यारोहक सुविधा कडलग यांचा सत्कार मॅनेजिंग ट्रस्टी स्वाती कोयटे,निरीक्षक गिरीश टोकसे यांचा सत्कार सदस्य अरविंद शिरोडे यांच्या हस्ते करण्यात आला आहे.प्रमुख पाहुण्यांचा परिचय प्राचार्या हर्षलता शर्मा व उपप्राचार्य समीर अत्तार यांनी करून दिला आहे.
या राष्ट्रीय स्पर्धेत प्रामुख्याने महाराष्ट्र व गोवा राज्यातील ९२ संघातील १२०० स्पर्धकांनी सहभाग नोंदविला आहे.समता इंटरनॅशनल स्कूलच्या माध्यमिक विभागातील विद्यार्थ्यांनी ‘भारतातील विविधतेतील एकात्मता’ या विषयावर नृत्याविष्कार करून भारतातील विविध राज्यांच्या संस्कृतीचे दर्शन घडविले आहे.
सदर कार्यक्रमाचे सुत्रसंचालन इ.९ वीतील विद्यार्थी आर्यन कुमार व इ.१० वीतील विद्यार्थिनी अनुष्का ठोळे यांनी केले.उपस्थितांचे आभार इ.१० वीतील विद्यार्थी कृष्णा गुप्ता याने मानले आहे.
