किराणा व्यापारी हा देशाच्या अर्थचक्राला गती देणारा-झांबड

न्यूजसेवा
कोपरगाव-(प्रतिनिधी)

कोपरगावातील प्रत्येक किराणा व्यापारी त्यांच्या व्यवसायात सकारात्मक दृष्टीकोन,व्यवहारात पारदर्शकता आणि प्रगतीसह भारतीय अर्थव्यवस्थेला गती व दिशा देण्याचे महत्त्वपूर्ण काम करत असल्याचे प्रतिपादन महाराष्ट्र चेंबर ऑफ कॉमर्सचे उपाध्यक्ष तनसुख झांबड यांनी नुकतेच एका कार्यक्रमात बोलताना केले आहे.

“व्यापाराच्या दृष्टीने कोपरगाव तालुक्याची असलेली ओळख आजतागायत प्रत्येक व्यापाऱ्याच्या स्मरणात असून तसे गतवैभव कोपरगाव तालुक्याला प्राप्त करून देण्यासाठी कोयटे यांच्या मार्गदर्शनाखाली कोपरगाव तालुका व्यापारी महासंघ,कोपरगाव तालुका किराणा मर्चंट असोसिएशन द्वारा सतत नवीन नवीन उपक्रम राबविण्यात येत असतात.त्यातीलच युवा किराणा व्यापाऱ्यांना प्रोत्साहन देण्यासाठी आयोजित केलेला प्रोत्साहनपर सोहळा हा निश्चितच स्तुत्य आहे”-हेमंत राठी,अध्यक्ष,राम बंधू मसाले नगर.

समता नागरी सहकारी पतसंस्थेच्या स्व.यशवंतराव चव्हाण समता सहकार सभागृहात कोपरगाव तालुका किराणा मर्चंट असोसिएशनच्यावतीने युवा किराणा व्यापारी प्रोत्साहन सोहळ्याचे आयोजन करण्यात आले होते त्यावेळी ते बोलत होते.कार्यक्रमाच्या अध्यक्षस्थानी राज्य पतसंस्था फेडरेशचे अध्यक्ष ओमप्रकाश कोयटे हे होते.

सदर प्रसंगी किराणा मर्चंट असोसिएशनचे उपाध्यक्ष चांगदेव शिरोडे,नारायण अग्रवाल,केशवराव भवर,गुलशन होडे,किरण शिरोडे,दीपक अग्रवाल आदींसह कोपरगाव तालुका व्यापारी महासंघ आणि कोपरगाव तालुका किराणा मर्चंट असोसिएशनचे पदाधिकारी,सदस्य उपस्थित होते.

त्यावेळी पुढे बोलताना ते म्हणाले की,”युवा किराणा व्यापारी हा शहराच्या नाव लौकिकाबरोबरच स्वतःच्या व्यवसायाची देखील ओळख करून देत असतो.स्वतःची ओळख करून देण्याची सकारात्मक मानसिकता कोपरगावातील युवा किराणा व्यापाऱ्यांकडे आहे.हेच युवा किराणा व्यापारी कोपरगाव शहराची,’कॅलिफोर्निया’अशी असलेली ओळख पुन्हा मिळवून देतील.असा विश्वास व्यक्त करून त्यांच्याकडे असणारी जिद्द,कल्पनाशक्ती यामुळे मॉल संस्कृती कडून सकारात्मक गोष्टी स्वीकारून,डिजिटल तंत्रज्ञानाद्वारा बदलत्या काळानुसार व्यवसायातही बदल करावेत असे आवाहन झांबड यांनी शेवटी केले आहे.

सदर प्रसंगी कार्यक्रमाचे प्रास्ताविक कोपरगाव तालुका किराणा मर्चंट असोसिएशनचे अध्यक्ष राजेंद्र बंब यांनी केले आहे.त्यावेळी पवन डागा,पुष्पक डागा,सार्थक बंब आदीनी मनोगत व्यक्त केले आहे.या प्रोत्साहनपर सोहळ्याचे सुत्रसंचलन व्यापारी महासंघाचे कार्याध्यक्ष सुधीर डागा यांनी केले.उपस्थितांचे आभार व्यापारी महासंघाचे नारायण अग्रवाल यांनी मानले आहे.